المعرب و المبني من الاسماء

السلام عليكم و رحمة الله و بركاته
عرفنا قبل كده ان في معرب و مبني
من الافعال و تم شرحها بفضل الله
من الاسماء و ده موضوع النهارده بإذن الله

اتفقنا ان المبني زي الحيطة المبنية مابتتغيرش و لا بتتحرك و ده هو المبني اخر حرف مبيتغيرش مهما جه في الجملة
اما المعرب بيتغير حسب موقعه سواء رفع او نصب او جر
تمام ؟

كل الاسماء معربة ما عدا شوية حاجات كده هي اللي مبنية ، يعني نعرف المبني كويس و غيره يبقا معرب
يلا بينا ناخد المبني من الاسماء
.ً..................................................
اول حاجة : الضمائر
الضماير نوعين منفصلة يعني تكون جايه لوحدها كده مش لازقة في حاجه تيجي مستقلة كده لوحدها
النوع التاني متصلة
يعني تيجي لازقة فحاجه يعني متجيش لوحدها لازم تيجي موجودة معاها حاجه

١- نشوف المنفصلة
(انا ، نحن ، انتَ ، انتِ ، انتما ، انتم ، انتن ، هو ، هي ، هما ، هم ، هن)
الضماير دي تعرب حسب موقعها في الجملة و خليها ثابتة عندك ان الضماير دي كلها اللي فوق تيجي في محل رفع بس
يعني مبتدأ او فاعل او اسم كان
زي مثلا
انا اذهب الي المدرسة
هنا الضمير (انا ) ده منفصل اهو جه لوحده و كمان في محل رفع عشان مبتدأ
اجي اعرب اقول
(ضمير منفصل مبني في محل رفع مبتدأ)
نحن نكتب الواجب
اشوف الضمير نحن منفصل و محل رفع
اعربه : ضمير منفصل مبني في محل رفع مبتدأ
و الفعل نكتب الفاعل بتاعه ضمير مستتر تقديره نحن

ملحوظة : الضمير (اياك) و مشتقاته اللي هي (اياكَ - اياكِ -اياكما -اياكم - اياكن -اياه - اياها - اياهما -اياهم -اياهن)
الضمير ده و مشتقاته يجي في محل نصب
زي ايه
اياك نعبد و اياك نستعين
عاوز افهمك اصلا ان اياك دي اصلها الكاف يعني كانت كده
نعبدك و نستعينك
بس لما تيجي ضمير منفصل مينفعش اقول
نعبد ك و نستعين ك
لا لازم تتحول اياك
طب مينفعش نعبد اياك و نستعين اياك
لازم تتقدم علي الفعل يبقا
اياك نعبد و اياك نستعين
طب براحه بقا الكاف اللي في الاول كانت تتعرب ايه
مفعول به صح ؟
يبقا اياك مفعول به
بس تعال شوف الاعراب هنقول
إيا : ضمير منفصل مبني في محل نصب مفعول به
و الكاف حرف خطاب مبني لا محل له من الاعراب
و هكذا بقا كل المشتقات بتاعته هنعرب ( إيا ) هي اللي في محل كذا
و المتصل بيه هنقول يا حرف خطاب لا محل له من الاعراب دا لو كاف
او لو هاء هنقول حرف خطاب للغائب لا محل له من الاعراب

٢- الضمائر المتصلة
(واو الجماعة - نا - هاء الغيبة - الف الاثنين - تاء الفاعل - كاف الخطاب - ياء المخاطبة )
الضمائر دي كلها متصلة تيجي مع حاجه متجيش لوحدها و هي مبنية في محل .........(حسب موقعها في الجملة)
زي ايه
- ضربنا المعلم. ال نا هنا ضمير متصل مبني في محل نصب مفعول به

- ضربنا العدو و هزمناه. ال نا هنا ضمير متصل مبني في محل رفع فاعل

ملحوظة مهمة :( نا) بنعربها حسب المعني يعني في اول مثال المعلم هو اللي ضربنا يعني احنا مفعول به يبقا ( نا ) مفعول به
في المثال التاني احنا اللي هزمنا العدو يبقا احنا الفاعل عشان كده ( نا ) فاعل
و نلاحظ الكلام ده لما ( نا ) اتصلت بفعل
انما لو اتصلت باسم يبقا مضاف اليه زي اللي جاية دي

- كتبنا قيمة. ال نا هنا اتصلت ب اسم يبقا ضمير متصل مبني في محل جر مضاف اليه

- التلاميذ كتبوا الواجب. واو الجماعه ضمير متصل مبني في محل رفع فاعل

- الولدان كتبا الدرس. الف الاثنين ضمير متصل مبني في محل رفع فاعل
لما نقول

- رأيتك اليوم. كاف الخطاب ضمير متصل مبني في محل نصب مفعول به

- رأيته اليوم هاء الغيبة ضمير متصل مبني في محل نصب مفعول به
كتبت الواجب. تاء الفاعل ضمير متصل مبني في محل رفع فاعل

- اكتبي الواجب. ياء المخاطبة ضمير متصل مبني في محل رفع فاعل
و هكذا

عاوز اقولك بقا الاعراب الصحيح لما تقول مبني تقول مبني علي كذا في محل
كذا دي اعرفها ازاي
حسب النطق بقا
مثلا
رأيتك. الكاف مفتوحة صح لو للمخاطب المذكر
يبقا ضمير متصل مبني علي الفتح
طب لو للمؤنث هتلاقيها مكسورة يبقا مبني علي الكسر
طب عاوزك تعرف ان اي ضمير اخره الف او ياء تنطقها الف
زي انا - هي
يبقا مبني علي السكون
طب نحن مضمومة يبقا مبني علي الضم
و نتفق اي ضمير يتصل بفعل يبقا يا اما فاعل يا مفعول حسب المعني
و لو اتصل باسم يبقا في محل جر مضاف اليه
و لو جت مع حرف جر تبقا في محل جر
......................................................
تاني حاجه : اسماء الاشارة
و هي (هذا. هذه. هذان. هاتان. هولاء. اولائك. هنا. هناك. ذلك. تلك )
كل اسماء الاشارة دي مبنية ما عدا
(هذان و هاتان)
دول يعربوا زي المثني يعني يرفعوا بالالف و ينصبوا و يجروا ب الياء
بعد كده كله مبني زي ايه
- هذا طالب مجتهد
هذا اسم اشارة مبني في محل رفع مبتدأ

- تلك الشجرة جميلة
تلك اسم اشارة مبني في محل رفع مبتدأ

- رأيت هذا الولد
هذا اسم اشارة مبني في محل نصب مفعول به

و المعرب زي
- هذان طالبان مجتهدان
هذان مبتدا مرفوع بالالف لانه ملحق باعراب المثني

- سلمت علي هاتين الطالبتان
هاتين اسم مجرور و علامه جره الياء لانه ملحق باعراب المثني

عاوز افهمك ان هذا. هذه. هولاء
الهاء اسمها للتنبيه
اسم الاشارة نفسه هو ذا و ذه
و ساعات ذه دي بتكون ذي يعني هذي
و تكون ته
فلو شفتها تبقا عارف انها واحد
عرفنا كده اسم الاشارة بيكون مبني
...............................................................
تالت حاجه : الاسم الموصول
و هما (الذي. التي. اللذان. اللتان. الذين. الاتي)
كلهم مبنين عادي زي اسم الاشارة بس ما عدا برضوا اللذان و اللتان
يعربوا برضوا اعراب المثني
امثله بقا

- جاء الذي ذهب
الذي اسم موصول مبني في محل رفع فاعل

- رايت الذي ذهب
الذي اسم موصول مبني في محل نصب مفعول به

- سلمت علي الذي ذهب
الذي اسم موصول مبني في محل جر اسم مجرور
و الباقي زيه كده

نشوف اللذان و اللتان
- جاء اللذان ذهبا
اللذان اسم موصول فاعل مرفوع بالالف لانه ملحق باعراب المثني

- رأيت اللتين ذهبتا
اللتين اسم موصول مفعول به منصوب بالياء لانه ملحق باعراب المثني

- سلمت علي اللتين ذهبتا
اللتين
اسم موصول اسم مجرور بالياء لانه ملحق باعراب المثني
عاوز افهمك ان الجملة اللي بتيجي ورا اي اسم موصول من دول تعرب: جملة لا محل لها من الاعراب صلة الموصول
و ده خدناه الدرس اللي فات
تمام ؟
......................................................
رابع حاجه : اسم الشرط
هما (من. متي. اينما. اين. مهما. اي. حيثما. كيفما)
كلها مبنيه ما عدا اي
- من يزرع يحصد
من :اسم شرط مبني في محل رفع مبتدا
اعراب اسماء الشرط هيكون ليها شرح خاص لانها عاوزة شغل و تركيز
و درسنا النهارده اننا نعرف انها مبنيه بس و نعرف ان المعرب منها هو (اي)
تمام ؟ و الباقي مبني
الوقتي ده المهم عندي يعني التفاصيل بعدين
.........................................................
خامس حاجه :  اسماء الاستفهام
و هي (من. ما. كيف. متي. اين. كم. اي)
كلها مبنيه برضوا ما عدا اي
و اعرابهم هيكون مع اعراب اسماء الشرط في درس تفصيلي
لكن نعرف النهارده انهم من المباني
زي
من احب الناس اليك ؟
من : اسم استفهام مبني في محل رفع مبتدأ
و هنكتفي النهارده بمعلومه انهم مبنين و (اي) معربه
تمام؟
......................................................
سادس حاجه :الاعداد من ١١ لحد ١٩
ده اسمه العدد المركب
ده مبني علي الجزئين
زي ايه ؟

- اني رأيت احد عشر كوكبا
(احد عشر) عدد مبني علي فتح الجزئين في محل نصب مفعول به

- جاء تسعة عشر ولدا
(تسعة عشر) عدد مبني علي فتح الجزئين في محل رفع فاعل
تمام ؟
دا مع كله ؟ اه
بس ملحوظة صغيرة
العدد اتناشر (١٢)
ده معرب اعراب المثني
يعني كلمه اتنين هتترفع بالالف و تتنصب و تتجر بالياء
و كلمة عشرة هتبقا مبنية زي ما هي
نشوف كده

- جاء اثنا عشر ولدا
اثنا فاعل مرفوع بالالف لانه ملحق باعراب المثني
عشرة عدد مبني علي الفتح في محل جر
يبقا
كله مبني علي فتح الجزئين
ما عدا
(اثنا. و اثني (مذكر) ، اثنتا. اثنتي (مؤنث))
دول اعراب المثني و كلمة عشرة بتاعتهم مبنية في محل جر
تمام ؟
..................................................
سابع حاجه : بعض الظروف
زي ايه(حيث. منذ. امس. الآن. )
دول مبنين في محل نصب
اقول
جلست حيث جلس ابي
حيث : اسم مبني علي الضم في محل نصب علي الظرفية
و الباقي كده
امس مبني ع الكسر
الآن مبني ع الفتح
حيث منذ مبني ع الضم
خلي بالك من (قبل. و. بعد)
دول لو جه بعدهم مضاف اليه يبقا معربين
و لو جه بعدهم حاجه غير مضاف اليه يبقا مبنيين
زي ايه
لم اره من قبل السادسة
هنا جه بعدها مضاف اليه (السادسة)
يبقا قبل اسم مجرور بالكسرة (يعني معرب)
لما اقول
لم اره من قبل ابدا
مجاش بعده مضاف اليه
قبل : اسم مبني علي الضم في محل جر (يعني مبني )
عاوز افهمك كمان في ظروف مركبه
زي ايه
(ليل نهار - صباح مساء)
امثلة
حرسنا الوطن ليل نهار
(ليل نهار) ظرف مركب مبني علي فتح الجزئين في محل نصب
جاهد الجندي صباح مساء
(صباح مساء) ظرف مركب مبني علي فتح الجزئين في محل نصب
و عاوز اقولك ان كلهم في محل نصب لان الظرف اساسا منصوب
......................................................
تامن حاجه : اسماء الافعال سواء ماضي او مضارع او امر
الماضي زي (هيهات بمعني بعد - شتان بمعني تفرق - سرعان بمعني سرع)

- هيهات الفشل في الاجتهاد
هيهات : اسم فعل ماض مبني علي الفتح

المضارع زي (اف بمعني اتضجر - آه بمعني اتوجع - قط بمعني كفي )

- آه من الآلام
آه :اسم فعل مضارع مبني علي الكسر

الامر زي (آمين بمعني استجب - عليكم بمعني الزم و احفظ - حيّ بمعني اقبل - صه بمعني اسكت)

- حيّ علي الصلاة
حي :  اسم فعل امر مبني علي الفتح

- عليكم انفسكم
عليكم : اسم فعل امر مبني علي السكون

- صه عن الباطل
صه : اسم فعل امر مبني علي السكون

اسماء الافعل دي مبنية زي ما شوفنا و تعمل عمل فعلها يعني بترفع بعدها فاعل عادي

و كده عرفنا الحاجات المبنية و مطلوب افهم و اعرف عنوان كل نقطة و احفظه
و افهم اللي تحته
اظن الدرس سهل و مفيهوش حاجه

المعرب و المبني من الافعال اتكلمنا عنهم لما اتكلمنا عن الفعل

و الحرف دائما مبني

تمام كده ؟؟
و هنعرف اكتر في اللي جاي

الجمل التي لا محل لها من الاعراب

عرفنا الجمل اللي ليها محل
الوقتي بقا امتى اقول ( و الجملة لا محل لها من الاعراب)
برضوا ليها ٧ مواضع يلا نعرفها

١- الجملة الابتدائية
يعني اول جملة في الكلام ، مثلا بقرأ مقال او درس معين ، او بقرا قطعة نحو
اول جملة في الكلام بنقول عليها جملة لا محل من الاعراب
زي مثلا
محمد مجتهد ، يذهب كل يوم الي المدرسة
اهي جملة ( محمد مجتهد ) دي جملة اسمية في بداية الكلام بنقول لا محل لها من الاعراب
......................................................
٢- جملة صلة الموصول
دي جملة بتيجي بعد ( الذي ، التي ، اللذان ، اللتان ، الذين ، ما بمعني الذي او التي)
بنقول الجملة لا محل لها من الاعراب صلة الموصول
زي ايه
( سلمت علي الذي أكرمني)
هنا جملة (أكرمني) جت بعد الذي
يبقا لا محل لها من الاعراب صلة الموصول
و زيها بقا لو جت بعد اي اسم موصول
............................................................
٣- الجملة الاعتراضية
دي الجملة اللي بحس انها زيادة في الجملة بس جاية لغرض معين
مثلا لما اقول
اعلم - وفقك الله - ان العلم نور
جملة وفقك الله دي لا محل لها من الاعراب اعتراضية الغرض الدعاء طبعا
و كمان لما نقول
قال الله - عز وجل -
جملة ( عز و جل ) لا محل لها من الاعراب اعتراضية
قال الرسول - صلى الله عليه و سلم -
جملة ( صلى الله عليه و سلم) لا محل لها من الاعراب اعتراضية
عمر بن الخطاب - رضي الله عنه-
جملة رضي الله عنه لا محل لها من الاعراب اعتراضية
..........................................................
٤- جملة جواب القسم
عندنا اسلوب القسم بيتكون من
حرف قسم + مقسم به + جواب القسم
و الله لافعلن الخير
الواو هو الحرف
الله المقسم به
جواب القسم : لافعلن الخير
جملة جواب القسم دي بقا بنقول لا محل لها من الاعراب جواب القسم

و الله لاجتهدن في عملي
جملة ( لاجتهدن في عملي) لا محل لها من الاعراب جواب القسم
......................................................
٥- جملة جواب الشرط بعد (اذا ، لو ، لولا ، لوما)
الادوات دي غير جازمة يعني مفيش جزم
يبقا جملة الجواب مش في محل جزم لان مفيش جزم اصلا
يبقا الجملة لا محل لها من الاعراب
دي جملة الجواب يعني الجملة رقم اتنين
زي
اذا ذاكرت فانت ناجح
جملة (انت ناجح ) جواب شرط يعني الجملة التانية بعد (اذا)
و اذا غير جازمة
يبقا جملة (انت ناجح) لا محل لها من الاعراب
........................................................
٦- الجملة التفسيرية
و دي جملة بتفسر حاجة قبلها كانت مبهمة مش واضحة اوي
زي قوله - سبحانه و تعالي-
" و آية لهم الارض الميتة أحيينا"
هنا لو بصينا لكلمة آية لهم
هنلاقيها مش واضحة
ايه هي الآية دي ؟ تيجي الجملة بعدها تفسرها و تقولنا الأرض الميتة أحييناها
يبقا جملة (الأرض الميتة أحييناها) دي جملة لا محل لها من الاعراب تفسيرية
........................................................
٧- جملة معطوفة علي جملة لا محل لها من الاعراب
عندي جملة من اللي فاتوا دول يجي بعدها حرف عطف و تيجي بعده جملة تانية
الجملة التانية دي هتتعطف ع جملة ملهاش محل ، هيكون هي ليها محل ؟
اكيد لا
يبقا الجملتين ملهمش محل من الاعراب
زي
محمد مجتهد و علي نشيط

(محمد مجتهد) دي جملة و بداية الكلام يبقا لا محل لها من الاعراب ابتدائية
الواو حرف عطف
و جملة( علي نشيط) معطوفة ع اللي جملة اللي قبلها دي
تاخد نفس اعرابها
تبقا (علي نشيط) لا محل لها من الاعراب معطوفة على الجملة الابتدائية قبلها

و كده يبقا الجمل التي لا محل لها من الاعراب

الجمل التي لها محل من الاعراب

الجمل اللي ليها محل من الاعراب يعني الجمل اللي لما اقول ( و الجملة الاسمية او و الجملة الفعلية  في محل رفع كذا او في محل نصب كذا او في محل جر كذا او في محل جزم كذا )
هي دي معنى ان الجملة دي ليها محل من الاعراب
طب ايه هي بقا الجمل دي ؟

١- جملة خبر المبتدا او خبر إن او خبر كان
زي ايه
الولد يلعب الكرة
الولد مبتدا  ، عاوز اجيب الخبر اسال ماله ؟
يلعب الكرة
طب يلعب الكرة دي جملة و لا كلمة واحدة ؟
لا جملة ، و جملة فعلية كمان
يعني الخبر جملة فعلية
يبقا هنقول ان جملة (يلعب الكرة) في محل رفع خبر المبتدا
صح كده ؟
طب لو قولت
( كان الولد يلعب الكرة )
كان فعل ناسخ
الولد اسم كان
عاوز الخبر اسال ماله ؟
كان الولد ماله ؟
يلعب الكرة و دي جملة
يبقا الجملة في محل نصب خبر كان
تمام ؟
لو قولت ( ان الولد اخلاقه جميلة)
ان حرف ناسخ
الولد اسم ان
ماله ؟
اخلاقه جميلة ، طب الكلمة الاولي فيها ضمير ؟ اه الهاء يبقا دي جملة اسمية
و نقول و الجملة الاسمية في محل رفع خبر ان
ده اول جملة ليها محل
............................................
٢- جملة الحال
و جملة الحال نسال عنها ب (كيف) و دايما الاقي الاسم اللي قبل الجملة دي معرفة مش نكرة ، و جملة الحال دي ينفع تتحذف و المعنى مش هيتأثر
زي ايه
( جاء الطالب يبتسم )
كيف جاء الطالب ؟
يبتسم
و كلمة الطالب معرفة
يبقا جملة يبتسم دي حالية
و الحال دايما منصوب
يبقا جملة (يبتسم) في محل نصب حال
( جاء الولد و هو يضحك)
كيف جاء الولد ؟
وهو يضحك
و الولد معرفة
يبقا (و هو يضحك ) في محل نصب حال
دي تاني جملة
...................................................
٣- جملة النعت او الجملة الوصفية
دي جملة بتيجي بعد نكرة يعني الاسم اللي قبلها نكرة و كمان ينفع احذفها من الجملة و المعني ميتأثرش
زي ايه
جاء طالب يضحك
جملة( يضحك) بعد نكرة (طالب)
و ينفع تتحذف
تبقا نعت
في محل رفع نعت
ليه رفع ؟ عشان كلمة طالب فاعل مرفوع و النعت بيكون زي اللي قبله
....................................................
٤- جملة جواب الشرط المقترنة بالفاء
عندنا في اسلوب الشرط بيكون في فعلين مضارعين و بيكونوا مجزومين
ان تجتهد تنجح
تجتهد مجزوم فعل الشرط
تنجح مجزوم جواب الشرط
ينفع بقا اشيل تنجح ده و احط جملة مكانه ؟ اه
ان تجتهد فأنت ناجح
بنقول بقا ان جملة (فأنت ناجح ) في محل جزم جواب الشرط
ليه بقا ؟ عشان الاصل لو في مضارع كان هيبقا مجزوم
يبقا الجملة لما تيجي مكانه تبقا في محل جزم
...................................................
٥- الجملة الاضافية
و دي جملة بعد الظرف ( حيث ، حين ، اذا )
طيب اللي بيجي بعد الظرف بيتعرب مضاف اليه تمام ؟
طب لو جملة جت بعد ظرف ؟
يبقا الجملة في محل جر مضاف اليه
زي
مررت حيث مرّ محمد
حيث ده ظرف
و بعده جملة (مر محمد)
يبقا الجملة في محل جر مضاف اليه بعد حيث

و بنقول برضوا لو جت بعد اذا
يعني تكون الجملة الاولي بعد اذا ع طول
بنقول عليها في محل جر مضاف اليه بعد اذا
زي
اذا ذاكرت نجحت
جملة (ذاكرت) في محل جر مضاف اليه بعد اذا
.......................................................
٦- جملة مقول القول
و دي جملة بتيجي بعد الفعل ( قال ، يقول ، قل )
و بتبقا الجملة كلها في محل نصب مفعول به للفعل قال او يقول او قل حسب اللي جه في الجملة
قال محمد : ان العلم نور
جملة( ان العلم نور ) كلها كده في محل نصب مفعول به مقول القول
و متن الاحاديث النبوية الشريفة كلها بتكون من النوع ده
عشان دايما نقول قال رسول الله صلى الله عليه و سلم و يجي بعد كده المتن
يبقا المتن كله مفعول به مقول القول
....................................................
٧- جملة معطوفة على جملة لها محل من الاعراب
يعني جملة من اللي وضحناهم فوق دول في الاول و يجي حرف عطف و بعده جملة تانية
الجملة التانية دي المعطوفة بتكون معطوفة في محل كذا
نفس محل الجملة الاولى
زي ايه

جاء الطالب يضحك و يجري
جملة يضحك بعد معرفة اللي هو الطالب
و كمان ينفع نحذفها
يبقا دي حال
(يضحك) في محل نصب حال
الواو حرف عطف
(يجري) دي معطوفة ع جملة يضحك
طب تاخد نفس الاعراب
يضحك في محل نصب
يبقا (يجري) معطوفة في محل نصب

و كده خلاص دول الجمل اللي ليهم محل من الاعراب

الجملة الاسمية و الفعلية

الجملة وأقسامها

الجملة : هى ماتركب من كلمتين أو اكتر ولها معنى تااام

يعنى مش أى كلمتين نقول عليهم جملة لازم يكون ليهم معنى بيتمم الجملة
زى  ايه ؟

لو قولت (الحديقة واسعة )
دول كلمتين بس فهمونى ان الحديقه واسعة
تمام؟

طيب الجملة دى لها أقسام
اول حاجة تنقسم باعتبار بدايتها الى قسمين:
جملة اسمية ... وجملة فعلية

الاول يعنى ايه باعتبار بدايتها؟
يعنى بتبدأ بإيه!!

نيجى لأول قسم وهو:
الجملة الإسمية: هي كل جملة تبدأ باسم مرفوع يعرب مبتدأ ويكمل معناه الخبر

يعنى الجملة اللى عندنا عشان اقول عليها اسمية لازم تكون بدايتها اسم والاسم ده دائما يجى مرفوع وبعربه مبتدأ
يبقا هنا فيه فائدة : ان الاسم فى اول الكلام نعربه مبتدأ  تمام
طيب الاسم ده لو جه لوحده هنفهم منه حاجه يعنى لو قولت مثلا
محمد  انا مفهمتش ماله؟
لكن لو قولت محمد رسول الله
اه كده المعنى بقا واضح ان محمد رسول الله
نسال محمد ماله ؟
رسول الله
يبقا رسول الله خبر
طب كلها ع بعضها خبر ؟ هقولك بص ع اول كلمة فيها ضمير يعود ع المبتدا
لا مفيش ضمير
يبقا كلمة رسول هي اللي خبر
و لفظ الجلالة مضاف اليه

نعرب بقا الجملة
محمد : مبتدأ مرفوع وعلامة  رفعة الضمة الظاهرة
رسول : خبر مرفوع وعلامة رفعه الضمة الظاهرة
الله : لفظ الجلالة مضاف إليه

طيب الخبر هنا اللى هو رسول الله  ده نوعه ايه؟
مفرد
مفرد عشان هو كلمة واحدة مفيهاش ضمير
والمفرد ده مش معناه انه مش مثنى و لا انه جمع لا ده معناه انه لا جملة و لا شبه جملة زي ما هنشوف و كمان المفرد ده ممكن يجى :
مثنى او جمع مذكر سالم او جمع مؤنث سالم وهكذا
زي ايه
المعلمان نشيطان
نشيطان خبر مفرد عشان كلمة واحدة

المعلمات نشيطات
نشيطات خبر مفرد عشام كلمة واحدة

طيب الخبر لما يجى كده مفرد بنقول ع الجملة الاسمية ( اسمية صغرى )

اما لو الخبر جه جملة او شبه جملة بنقول عليها ( اسمية كبرى)
زى جملة
( الحديقة اشجارها مثمرة)
هنا نقول الحديقة مالها ؟
اشجارها مثمرة
ابص لاول كلمة فيها ضمير ؟ اه فيها الهاء اهو
يبقا كده ده خبر جملة اسمية ع طول
طب لما هو جملة اسمية يبقا مبتدا و خبر
يبقا  كلمة
اشجارها مبتدا ثان
مثمرة خبر للمبتدا الثاني
و الجملة الاسمية في محل رفع خبر للمبتدا

و زي ايه كمان
( البنت تلعب فى الحديقة)
هنا البنت مالها ؟
تلعب في الحديقة
دي بادئة بفعل صح ؟
يبقا خبر جملة فعلية
نعربها
البنت: مبتدأ مرفوع وعلامة الرفع الضمة الظاهرة
تلعب: فعل  مضارع مرفوع وعلامة رفعه الضمة الظاهرة
في: حرف جر
الحديقة: اسم مجرور ب في وعلامة جره الكسرة الظاهرة
والجملة الفعلية ( تلعب فى الحديقة) فى محل رفع خبر المبتدأ
هو ده خبر الجملة

تمام كده الجملة الاسمية

طيب نيجي للقسم التانى
الجملة الفعلية

ومن اسمها نقول ان هيه اللى بتبدأ بفعل سواء الفعل ده ماضى او مضارع او امر متعد او لازم مبنى للمعلوم او مبنى للمجهول

م الاخر كل انواع الفعل اللى اخدناه

لو اى جملة لاقيناها بتبدأ بفعل تبقى دى علطول جملة فعلية

زى
ذهبت فاطمة إلى المدرسة
ذهب : فعل ماض مبنى على الفتح
وتاء التأنيث لامحل لها من الاعراب
فاطمة : فاعل مرفوع وعلامة الرفع الضمة الظاهرة
إلي : حرف جر
المدرسة : اسم مجرور ب إلي وعلامة جره الكسرة

والفعل ذهبت من الافعال اللازمة

مثال تانى:

تولج الليل فى النهار
نعرب
تولج: فعل مضارع مرفوع وعلامة رفعه الضمة
والفاعل ضمير مستتر تقديره انت تعود على الله -سبحانه وتعالى -
الليل : مفعول به منصوب وعلامة نصبه الفتحة
في  حرف جر
النهار  اسم مجرور ب في وعلامة جره الكسرة
والفعل هنا متعدى

بس كده
وده كان شرح الجملة الاسمية والفعلية

الحرف ( معناه و تقسيماته)

بسم الله
( الحرف )
الحرف هو ماليس له معنى فى نفسه وانما يظهر معناه مع غيره
يعنى ايه التعريف ده؟؟

يعنى انا لو جيت قولت (في) وسكت انا فهمت ايه؟
ولا حاجه
طيب لو قولت ( الولد في البيت)
كده المعنى اتضح
يبقا الحرف مع نفسه ملهوش معنى م الاخر كده ، انما مع غيره بيكون له معنى ،
لازم يجى مع غيره عشان يبقا له قيمة
تمام كده

طيب الحروف دى قسمين:
حروف عاملة وحروف غير عاملة

ايه هي الحروف العاملة ؟؟
من اسمها كده باين ان لها عمل يعنى حروف لما بتدخل ع الجملة بتغير ف اعراب الجملة دي

طيب نفهم بمثال
انا لما اقول الحديقة جميلة
الجملة دى عبارة عن ايه؟
مبتدأ وخبر
الحديقة مبتدأ مرفوع بالضمة وجميلة خبر مرفوع بالضمة
تمام

طيب هتيجى واحدة اسمها إنّ  ومعاها اخواتها  تدخل ع الجملة دى هتغيرها
اسمها ان واخواتها
( إنّ ،، أنّ ،، كأن ،، ليت ،، لكن ،، لعل)
الحروف دى تدخل ع الجملة الاسمية تعمل فيها ايه؟
تنصب المبتدأ ويبقى اسمها وترفع الخبر ويبقى خبرها
زى لو قولت    ( الحياة جميلة )
الحياة مبتدأ مرفوع
جميلة خبر مرفوع
طيب تيجى إن تدخل عليهم
تبقى الجملة ( إن الحياة جميلة )
نعرب بقا
ان حرف ناسخ
الحياة اسم ان منصوب بالفاتحة
جميلة  خبى ان مرفوع بالضمة
وكده كل اخواتها
تمام ؟
و من الحروف العاملة كمان النواصب و الجوازم اللي بتدخل ع الفعل المضارع
لانها بتغير إعراب الفعل المضارع منصوب او مجزوم و الحروف دي ( لم ، لن ) و بقية النواصب و الجوازم
و كمان حروف الجر بتغير في إعرب الاسم بعدها بتخليه اسم مجرور
يبقا كده تمام الحروف العاملة

طيب فيه بقى حروف مش عاملة يعنى ملهاش لازمة ف الجملة ولا تغير شئ ف اعرابها هيه مجرد بس بتيجي لدلالة معين لكن مبتغيرش في اعراب الاسم و لا اعراب الفعل اللي بعدهم
زى احرف الجواب
( بلى و نعم ) هنا الدلالة يا اما بثبت الجملة او بنفي الجملة
يعني لما بجاوب ع سؤال مثلا ( هل أتيت ؟) و اقول - نعم أتيت
الحرف نعم هو هنا مأثرش في اعراب الفعل بعده ، لكن هو افاد الاثبات في المعنى
تمام ؟

طيب هي الحروف كلها واحد اللي يدخل ع الاسماء يدخل ع الافعال و هيصة كده و لا كل واحد منهم ليه حاجات خاصة بيه

اول حاجة حروف مختصة بالاسماء
بتيجى مع الاسماء بس مينفعش تيجى مع الفعل
زى ايه ؟ حروف الجر
لما اقول ( البنت فى الحديقة )
هيه كده جت مع الاسماء ومشيت الجملة
مينفعش تيجى مع فعل
ينفع اقول ( فى تلعب البنت ) ؟
لا
يبقى حروف الجر تيجى مع الاسماء بس
زى
( من .. الى .. عن .. على )  كفايه كده الوقتى

تانى حاجه حروف مختصة بالأفعال
يعنى مش بتيجى الا مع الفعل زى النواصب والجوازم ، حروف الجزم واخدناهم  ف الفعل
(لم  لما لا الناهيه لام الامر )
وحروف النصب
( أن لن كى حتى لام التعليل )

دول يجوا مع الافعال
مثال: لم يأت موعد الافطار ، لن يحضر الطالب
تمام ؟

تالت حاجة حروف مشتركة بين الاسماء والافعال
زى ( حروف العطف وهل الاستفهامية و همزة الاستفهام)
دول بيجوا مع الاتنين
من حروف العطف الواو
وكفاية نعرفها الوقتى
مثال أتى محمد وعلى وسعيد
هنا حروف العطف دخلت ع الاسم طب نشوف كده
صام و صلى
هنا دخلت ع الفعل يبقا مشتركة بين الاسم و الفعل
وحرف الاستفهام( هل )معروف بنستفهم بيه عن شئ
هل أديت الاختبار؟
هل محمد أتي اليوم ؟
أذاكرت اليوم ؟
هل ذاكرت اللغة العربية ؟ 😂
هل محمد ذاكر اللغة العربية؟
هنا بنلاقي هل و الهمزة دخلت ع الاسم و الفعل معنى كده انها مشتركة بينهم

كده الحرف  تمام